நல்லூர் திருவிழா

தேர்த்திருவிழா தினத்தன்று பல்லாயிரக்கணக்கான அடியார்கள் கூடி நிற்க, பக்தர்களின் ‘’அரோகரா…’’  எனும் கோசம் வானைப் பிளக்க, நாதஸ்வர வித்துவான்களின் மங்கள இசை முழங்க, வசந்த மண்டப திரைகள் விலக சுப்பிர மணிய ஆறுமுக சுவாமி கஜவல்லி மகாவல்லி சமேதராக வசந்த மண்டபத்தில் திருக்காட்சி கொடுத்து பக்தர்களுக்கு அருள் பாலிப்பார். இவ்வகையில் உள்வீதி வலம் வருவது கண்கொள்ளாக் காட்சியாகும்.  யாக சாலையில் பூசைகள் நிறைவு பெற்றதும் சண்முகப் பெருமாள் வெளிவீதியை வந்தடைவார். சித்திர ரதத்தில் கம்பீரமாக ஆரோகணித்த நிலையில் சண்முகப் பெருமானுக்கு தீபம் காட்டப்பட்டு ஆயிரக்கணக்கில் குவிக்கப்பட்ட தேங்காய்கள் பக்தர்களார் உடைக்கப்படும். அதனைத்தொடர்ந்து ‘’அரோகரா…’’ ஓசையுடன் தேரின் வடக்கயிற்றை பற்றிக்கொண்டு இழுக்கத்தொடங்குவர்.

                        மேள தாளங்களை இசைத்து சுமார் இரண்டு மணித்தியாலத்திற்கு மேல் வெளி வீதியில் வலம் வந்து தேர் இருப்பிடத்தை சென்றடையும். தேர் வீதி வலம் வரும் போது நான்கு வீதிகளிலும் நிறைகுடம் கும்பங்கள் வைத்து பூசைகளும் அர்ச்சணைகளும் இடம் பெறும். தேரைப் பின் தொடர்ந்து அடியார்கள் அங்கப்பிரதட்சணம், பாற்செம்பு, காவடிகள், தீச்சட்டி எடுத்தல், மற்றும் பஜனைகள் போன்றவற்றில் ஈடுபடுவர். தேர் இருப்பிடத்தை அடைந்த சிறிது நேரத்தில் முருகப் பெருமானுக்கு ‘’பச்சை சாத்தும் விழா ‘’ நடைபெறும். பச்சைநிற வஸ்திரத்தினால் அலங்கரிக்கப்பட்டு அர்ச்சணைகள் பூஜை வழிபாடுகள் இடம்பெறும். அதனையடுத்து தேரை நிறுத்தி வைக்கும் இடத்தில் இருந்து எழுந்தருளிய முருகப் பெருமான் கோபுர வாசலின் முன் நின்ற சப்பர ரதத்திற்கு முன்னால் ஆடி அசைந்து வந்து ஆலயத்தினுள் நுழைவார். பின்னர் உள் வீதியில் வசந்த மண்டபத்திற்கு முன்னுள்ள தெற்கு வாசல் வரை சென்று வசந்த மண்டபத்தை வந்தடைவார். வசந்ந மண்டபத்தை வந்தடைந்த முருகப்பெருமானுக்கு அபிஷேக ஆராதனைகள் இனிதே நிறைவு பெற்றதும் தேர்த்திருவிழா நிறைவுக்கு வரும்.